(1880s-1920s) Historia de una rosa
Emprestómi Pachón el de Quintana,
home que tien saber y muncha lletra,
un llibru llenu de veyura y cuentos
que par Dios que facíen tener cuenta,
yeren dellos perguapos y pruiome
aprender los meyores de cabeza.
Non vos espolvoriedes,rapazucos,
nin vos riades, voto a la montera,
que non ye cuentu, como abondes veces,
de travesura nin de fer la mueca.
Ya creés vos, magüetes de rapaces,
que ye casu de moza casadera
y que se dieren bones calabaces
el mozu a la rapaza o viceversa,
pos tampoco ye así; abride'l güeyu
y tené prevenida bien l'oreya
gue non perdaes migaya. Ye l'historia
d'una fresquina flor de primavera
que rellata, enfeliz, sin dexar rixu
desque nació nel huertu pura y fresca
fasta qu'entre les fueyes d'un llibrote
foi la probe caer rendida y muerta
enes manes d'algun estudiantexu.
Cúntola yo porq'aprendela supi
y aunque só quien la cunta, cúntala ella.
Falo esto así no más pa prevenivos
que si l'oyime vos causa llercia
el oyer una flor ye cosa estraña
y escuchar sos llaceries cosa güena
conque ponede'l xuiciu nesti cuentu
y escuchade la flor, que ya se quexa.
-Yo, como tantes otres
flores a cual más guapa,
moyada de rocíu
que frescu amorosaba
mio inocente corona
con un texíu de plata,
fermosa y gallaspera
falléme una mañana
sobre el tempranu brotu
verdín com'esmeralda,
de un rosal q´amorosa
una neña cudiaba.
To callavos el nombre
d´aquella desdichada,
quiero que sepia'l mundo
no más que so disgracia,
qu'el nombre, dulce nombre,
par Dios que lu añerara
del alma nos pleguinos
si m'atopás con alma.
Un día, triste día,
que non me veré farta
de lloralu, la neña
como nunca galana
arrimóse al rosal
en que me ximielgaba
y apurriéndomi un besu
con sos llabios de grana.
-Dulce rosa, mi dixo
mentantu q'una llárima
naciendo'n sos gúeyinos
mátose'n so garganta,
Rosina mía, cuerri
fresquina y colorada
a ser la portadora
del amor de mio alma,
por illi so dichosa,
por illi namorada,
en sos güeyinos veo
esllapariar la llama
qu'en so corazón cuerre
y en mio corazón para.
Y allargando ¡inocente!
so tienra mano blanca
del rosalín pelábame,
mas como no acertaba
con sos dedinos tienros
a retorcer la caña,
mordióme presurosa,
mordióme aquella engrata.
-¿Por qué, querida mía,
y dixi acongoxada,
por qué de tal manera,
en sin molete nada,
m'arrinques tú del tueru
que to mano cudiaba?
-Porque ponxo en tos fueyes
el ánxel de mio alma
sos güeyos y quier vete
en so mano adorada;
non llores q'ha querete
lo mesmo que to ama.
Y llegué hasta la mano
del pulidu rapaz
que d'allí a pocu tiempu
sin saber lo que fai
sobre'l pechu me punxo
d'una princesa ríal,
y aquella bona dama,
guapuxa por demás,
foi engaramitame
del moñu na metá,
rodiada de diamantes,
oru y seda torcial.
Pero yo tristiquina,
pensando ensin cesar
en mio amina del alma,
en mio queríu rosal,
entre tanta riqueza
diomi una enfermedá
que me diba quedando
todina espiritual.
Entamé a marchitame
y a mediu de secar,
pa celebrar les fiestes
d'un señor ...(Roto)
entre fueyes...(Roto)
rom... (Roto)
punxéronme'n un ramu
que foi después parar
a la santina mano
de virgen de bondá
que'n triste capillina
sobre modestu altar
la xente de l'aldea
venera en so piedá.
Y un día mui tempranu,
que no podré olvidar,....
ya non guardaba aromes...
mios tristes fueyes ya
estaben decaídes
y tristes a cual más,-----
metióse na capilla
el fíu del sacristán
y arrincome del ramu
y con tanta crueldá
que me tiró allá fuera
del huecu d´un ventán.
Llorades... no está mal porque'l que llora
ye qu'en sí mesmo l'enfeliz añera
un corazón sensible, dulce, amante
y una alma tamién sensible y tienra.
Non vos cunté esta historia mios fiyinos
pa que la deprendieres de cabeza,
nin tampoco par Dios pa que lloredes
si non pa que saquedes xuxa délla.
Munches, como esa rosa, mociquines
sin pizca de sentidu na cabeza,
el güeyu d'un rapaz les enquillotra
(Roto)... el cuayu y la entretela
(Roto)... sin saber les probines lo que facen
(Roto)... como llebratos pela era.